Эрүүл мэнд

image

ХҮҮХДИЙГ ДЭРТЭЙ УНТУУЛАХ НЬ ЗӨВ ҮҮ?

Дэргүй унтах нь хүүхдэд тань тухгүй байх гэж санаа зовж, бяцхан үрдээ дэр худалдаж авахаар зэхэж байна уу? Гэхдээ хүүхдэдээ хэзээнээс дэр хэрэглүүлэхээ мэдэхгүй байвал бид танд туслахаар дэртэй унтуулах нь хүүхдэд ямар нөлөөтэй мөн хэзээнээс дэр ашиглуулах нь зөв бэ гэдэг талаар мэдээллийг хүргэж байна.

Хүүхдэдээ хараахан дэр дэрлүүлж эхлээгүй байгаа бол битгий санаа зовоорой. Учир нь хүүхэд тань дэртэй унтах, дэргүй унтахын ялгааг одоохондоо мэдээгүй байгаа гэсэн үг.

Дэлхийн ихэнх хүүхдийн эмч, зөвлөхүүд нэг нас хүрээгүй хүүхдийг дэртэй унтуулахыг хориглодог. Учир нь тэд үүнийг өндөр эрсдэлтэй гэж үздэг.

Хүүхдийн ор дэртэйгээ ирдэг ч хэрэглэхээс зайлсхийх нь зөв. Ингэснээр учирч болох эрсдэлээс хайртай үрээ хамгаалж байна гэсэн үг юм.

ХҮҮХДИЙН ДЭРИЙГ ХЭРХЭН СОНГОХ ВЭ?

Хэрвээ та хүүхдэдээ дэр сонгох гэж байгаа бол доорх зөвлөмжүүдийг хараарай.

1.Жижигхэн бас хавтгай дэрнээс эхэл

  • Хүүхдийн дэлгүүрээс хамгийн жижигхэн бас хавтгай нимгэн дэрийг хайх. Харин хэтэрхий зөөлөн эсвэл хэтэрхий хатуу дэр битгий сонгоорой.
  • Өдөн дэр авахаас зайлсхий. Өдөн дэр хэрэглэснээр хүүхэд тань түүндээ даруулж амьсгал нь боогдох мөн дэр задарвал өдний үзүүртэй хэсэгт нүүр нүдээ гэмтээх аюултай.

2.Хүүхдээ үүнд үнэхээр бэлэн эсэхийг шалга

Хүүхэд өөрөө орон дээрээ гарч чаддаг болсон тэр үед л түүнд дэр авч өгөх нь хамгийн тохиромжтой үе юм.

  • Хүүхэд өөрөө дэртэй унтахыг хүсэж буйгаа танд хэлнэ. Таны дэрийг сонирхон дээр нь хэвтэж үзэхийг хүснэ.
  • Дэр дэрлэх нь хүүхдэд тань жаахан л тухгүй санагдах юм бол дэрлүүлэх шаардлагагүй. Шууд ав. 

ДЭР СОНГОХДОО

Хүүхдийнхээ аюулгүй байдлын төлөө дэр сонгохдоо нухацтай хандах хэрэгтэй.

  • Дахин сануулахад хэтэрхий зөөлөн бас хэтэрхий хатуу дэр битгий сонгоорой.
  • Харшил үүсгэх нийлэг материалтай дэр авахаас зайлсхий.

Хэрвээ хүүхэд тань дэр дэрлэж болох насанд хүрсэн ч дэргүй унтдаг бол заавал дэр дэрлүүлэх гэж оролдох хэрэггүй. Хүүхэд тань тухгүй унтаж байгаа мэт харагдаж болох ч хүүхдэд өөрт нь тухтай байж болох юм.

Эх сурвалж: http://www.momjunction.com/

Орчуулагч: О.Хандмаа

X
Нэвтрэх