Хүүхдийн шүдний хар түрхлэг гэдэг нь шүд дөнгөж цоорч эхэлж байгаа үед түрхэнэ. Хар түрхлэгийг түрхсэнээр шүдний өнгөц цоорлыг гүн болохоос урьдчилан сэргийлэх зориулалттай юм. Түрхлэг түрхээд  6 сарын дараа ахин түрхүүлж эмчид үзүүлэх шаардлагатай юм.

Сүүн шүд хугацаандаа унахгүй байгаа тохиолдол их байдаг. Үүний гол шалтгаан нь чанасан мах, ааруул, цагаан идээ,  алим зэрэг хатуу зүйл идэхгүй байгаатай холбоотой гэж мэргэжлийн эмч нар үздэг. Учир нь сүүн шүд шимэгдэж байж дараагийн буюу ясан шүд ургадаг. Тиймээс хугацаандаа шимэгдэхгүй байгаагаас болж шүд давхардан ургах, сүүн шүд унадаггүй аж.

Буруу зуулт нь төрөлхийн болон механикаар бий болно. Механик буюу соосго хөхөх, хуруугаа хөхөх зэрэг нь шүдний зуултыг өөрчилдөг. Яг юунаас болж байгааг илрүүлж гажиг заслын эмчид үзүүлээрэй.

Хүүхдийн шүдийг угаахдаа: Амыг нь том ангайлгана. Үүдэн шүднээс эхэлж угаана. Дээд үүдэн шүдийг дээрээс нь доош. Доод үүдэн шүдийг доороос нь дээш чиглэлтэйгээр угаана. Араа шүдийг эргэлдэх хөдөлгөөнөөр угаана.

Шүд цоорох гэдэг нь халдварт өвчин юм. Эцэг эхээс ахуйн замаар халддаг байна. Энэ нь аяга, халбаганаас болон амнаас ам дамжиж халддаг. Шүд цоорсноор хүүхдийн шүдний пааланг гэмтээж эрдэсгүйжүүлж байгаа юм. Тэхээр эцэг эхчүүд хүүхдийн уруул дээр үнсэх, угж соосгыг нь үмхэх нь халдвар тараагч болж байгаа гэсэн үг юм.

Бага насны хүүхдийн шүд цоордог. Хэдий шүд цоорсон ч гэсэн ёзоорыг нь авдаггүй ба заавал эмчлүүлэх шаардлагатай.