Хүүгээ 5 нас хүрэнгүүт зөвхөн түүнд тусгайлан цаг гаргаж болзож байгаарай. Ингэсэн тохиолдолд шилжилтийн насан дээр нь бэрхшээл бага тулгардаг. Ээж хүүгийн хамтдаа хийж болох зүйлсээс санал болгоё. Та бүхэн ч бас бусдадаа санаа өгөөрэй.

1. Хамтдаа гарын доорх материалаар шинжлэх ухааны туршилт хийх.

2. Үлэг гүрвэлийн болон түүхийн музей үзэх. (Түүнээс өмнө ээж нь хүүхдэдээ тайлбарлах мэдлэгтэй болж судлах хэрэгтэй)

3. Хамтдаа тоглоомын газар машин унах (Мөргөлдөж, уралдаж үе тэнгийн найзууд мэт хөгжилдөх нь чухал)

4. Амьтны дэлгүүр орох. Заавал амьтан худалдаж авах нь чухал биш. Ээжүүд дэлгүүр хэсэхэд нүд нь сэргэдэг шиг хөвгүүд загас, нохойн дэлгүүр орохдоо таашаал авдаг.

5. Зун цэцэрлэгт хүрээлэнгээр дугуй унах, өвөл котокоор гулгах.

6. Хүнсээ цуглуулахдаа хамт явах.

7. Хүүгийнхээ дуртай хоолыг хэрхэн хийхийг зааж өгч хамтдаа хийх. ( Ихэнхдээ загас, тахиа, төмс шарахад дуртай байдаг)

8. Кино театрт дуртай киног нь сонгож үзэх. (Түүхэн баатарлаг, тулаантай, амьтадтай, зөгнөлт гээд хөвгүүдийн сонирхлыг судлаарай)

9. Усан санд сэлэх.

10. Өөрийнхөө болон хүүгийнхээ бага, нялх байх үеийн зургийг үзэж тод үлдсэн дурсамжуудаа ярилцах.

11. Эмээ өвөөгийнх нь тухай, тэдний үеийнхний амьдралын онцлогийг өнөөдрийнхтэй харьцуулан хөөрөлдөх.

12. Хэн нэгэнд туслах, урам өгөх зүйлийг санаачлан хамтдаа хийх.

13. Гар барилдаан хийх, шагай, шатар тоглох.

14. Тав тухтай, болж өгвөл номтой кофе шоп орж шоколадтай сүү, жимсний шүүс уунгаа өдөр тутмын хууч хөөрөн үерхэл нөхөрлөл, охидын тухай яриа өрнүүлээрэй.

15. Хүүгийнхээ найзуудыг гэртээ урьдаг өдөртэй байх чухал. Найз нөхдийг нь таньж мэдэх, тэднийг зөв нөхөрлөх боломж бүрдүүлэхэд ээжийн дэмжлэг чухал шүү.

16. Хүүгээ эерэг үйлдэл хийсэн үед заримдаа урмын үгтэй захидал бичиж сэмхэн өрөөнд нь үлдээх.

17. Амжилтад хүрсэн хүмүүсийн түүхийг үзэх болон дурсамж номыг нь хамтдаа уншаарай.

18. Лего тоглоомын газар хамт тоглож, байшин, машин хийхдээ хүүгээрээ заалгаж туслалцуулаарай.

19. Хамтдаа аавд нь зориулж зураг зурж, сэтгэлийн үгтэй захидал бичээрэй.

20. Хүүхдээ өөрийнхөө болон аавынх нь ажлаар аялуулж юу хийдэг тухайгаа тайлбарлаж, танилцуулаарай.

За ингээд хүүтэйгээ болзоод байгаарай. Хүүгийнхээ сөрөг сэтгэл хөдлөлийг анзаарч, эерэг зан үйлийг нь дэмжиж идэвхтэй оролцоотой байна шүү. Хүү тань охидын нулимсыг арчих уу, урсгах уу гэх сонголт ээж таны түүнд зарцуулсан бодит цаг, эерэг нөлөөлөлтэй шууд хамааралтай байдаг.