ХЭЗЭЭ ӨГӨХ ВЭ?

Хүүхэд хоол идэх гэж хүсэхээс өмнө эхчүүд сайн дураараа нэмэгдэл хоол өгч болохгүй. Хүүхдэд 6 сартай болох үеэс анхны нэмэгдэл хоол өгнө. ДЭМБ-ын эмч мэргэжилтнүүд судалгаа туршилтаараа хүүхдэд 4 сар болохоос өмнө өгөх нь тохиромжгүй гэдгийг тогтоосон.

НЭМЭГДЭЛ ХООЛОНД ХЭТ ЭРТ ОРУУЛСНААР:

• Хүүхэд хөхөх эхийн сүүний хэмжээг багасгаснаар хүүхдийн хоолны тэжээллэг чанар багасна
• Хүүхдэд бага сартай үедээ өтгөвтөр хоол идэж чадахгүй тул тэжээллэг багатай шингэн хоол өгөх хэрэгтэй болох тул хоолны тэжээллэг чанар багасна.
• Эхийн сүүнээс авах өвчнөөс хамгаалах олон бодисыг авч чадахгүйд хүрсний улмаас хүүхэд өвчлөх эрсдэл ихтэй болно.
• Нэмэгдэл хоол эхийн сүү шиг цэвэр ариун байж хялбар шингэхгүй тул суулгалт өвчинд өртөх магадлалтай.
• Нэмэгдэл хоолонд хийдэг бусад малын сүүний уураг харшил үүсгэх хандлагатай тул харшлын гаралтай өвчинд өртөх нь их.
• Хүүхдээ цөөн хөхүүлсний улмаас эх эрт жирэмслэх магадлалтай.

НЭМЭГДЭЛ ХООЛОНД ОРОЙТОЖ ОРУУЛАХ НЬ Ч БАС ЭРСДЭЛ ДАГУУЛНА

• 6 сараас хэт хойш анхны нэмэгдэл хоол өгөх нь тохиромжгүй бөгөөд 6 сартайгаас нь нэмэгдэл хоол өгнө.
• Хүүхдийн өсөлт хөгжил, бусад олон үйл ажиллагаанд шаардлагатай илчлэгийг авч чадахгүйд хүрнэ.
• Өсөлт хөгжил нь удааширна.
• Хоол тэжээлийн дутлууд, төмөр дутлын цус багадалтаас сэргийлэх шаардлагатай бодисуудыг авч чадахгүйд хүрнэ.

АНХ НЭМЭГДЭЛ ХООЛОНД ОРУУЛАХДАА АНХААРАХ ЗҮЙЛҮҮД?

• Анхны хоол өгөх үед хүүхэд ямар нэг өвчнөөр өвдөөгүй байх
• Зуны халуунд нэмэгдэл хоолонд оруулах нь гэдэсний өвчнөөр өвдөх эрсдэл дагуулна
• Урьдчилан сэргийлэх тарилга хийлгэх хугацаанд нэмэгдэл хоол өгөх хэрэггүй
• Анхны нэмэгдэл хоолыг үдээс өмнө цаашид энэ цагтаа нэмэгдэл хоолоо дагнан идэх цагийг сонгож өгнө
• 2 хоол зэрэг өгч болохгүй
• 1 хоолонд дасаж хэмжээнд хүртэл өгдөг болсны дараа буюу 10-14 хоногийн дараа тухайн цагтаа хоолыг нь төрөлжүүлж өгч болно.
• Анхны нэмэгдэл хоол өгөх үед хүүхэд эрүүл, рахиттай, цус багадалттай, тураалтай, диатезтэй эсэхийг эмчээр тогтоолгосны дараа тохирох нэмэгдэл хоолыг өгнө.

 

Зөвлөх: М.Оюунбилэг /Анагаах ухааны доктор/

Эх сурвалж: 2 хүртэлх насны хүүхдийн хооллолт I, 2014 он